TFC inaeleza mchango wake katika Mkutano wa Wabunge Wanawake wa FP-ICGLR na maendeleo ya kilimo kikanda.
Mkurugenzi Mkuu wa Kampuni ya Mbolea Tanzania (TFC), Bw. Samuel Mshote, akieleza umuhimu wa TFC kama mdau wa Mkutano wa Wabunge Wanawake (WPC) wa Jukwaa la Maziwa Makuu (FP-ICGLR) utakaofanyika Novemba 2026 jijini Dar es Salaam.
Amesema TFC inaunga mkono malengo ya mkutano huo katika uwezeshaji wa kiuchumi, usalama wa chakula, maendeleo jumuishi, ushiriki wa wanawake na vijana, na ushirikiano wa kikanda. Ameeleza kuwa wanawake ni sehemu muhimu ya nguvu kazi ya kilimo, hivyo mbolea bora huboresha maisha ya jamii.
Kupitia kuagiza, kuchanganya na kusambaza mbolea, TFC inalenga kuongeza uzalishaji wa kilimo, kuboresha upatikanaji wa chakula, kusaidia wakulima wadogo hususan wanawake na vijana, na kuhamasisha kilimo endelevu kinachozingatia mabadiliko ya tabianchi.
Aidha, TFC inaona ushirikiano wa kikanda katika kilimo, biashara na viwanda kuwa msingi wa amani na ustawi wa ukanda wa Maziwa Makuu, na iko tayari kushirikiana na Mabunge, washirika wa maendeleo, mashirika ya wanawake na sekta binafsi kuimarisha mageuzi ya kilimo na usalama wa chakula.